＊台語翻譯頭一本 ＊日本文豪太宰治流傳後世的經典名作 ＊二戰後亞洲「存在主義」代表性小說 【術仔囝，連幸福嘛驚，摸著綿仔會割手，傍著福氣來著傷。】 《人間失格》佇日文的意思是「失去做人的資格」，是太宰治在世時上尾一部作品，嘛是日本文學永世的經典。規本冊分做踏話頭、三篇手記、後記，描寫主角大庭葉藏自細漢、少年時到二十外歲的人生。為著欲逃避現實，放人生廢墜去，歹囝浪蕩，癮酒，自殺，食藥仔自我麻醉。一步一步踏入不歸路，跋落去稀微的萬底深坑。 太宰治透過主角的經歷，對家己正剾倒削的氣口，消敨久年來硩佇心肝頭的鬱卒，向望予人疼惜、予人接受。有人講這是作者的半自傳作品，若親像欲共虛假的人世黜破，唱聲講：「做人，按怎才有夠格？」小說內的逐字逐句，攏是伊綿爛粒積的滾絞捙拚。 主角恥笑家己的人生是見笑代，煞予千千萬萬的讀者癮仙哥，為故事的飄撇氣味來痴迷。共人類的本質看透透，點破人性之垃圾穢涗。 人生的路，若失去做人的格；讀《人間失格》，用台文來贖罪。 ● 【台文審定＝林東榮Lîm Tong-îng】 日文經典文學的台文譯者，特別專心佇芥川龍之介的短篇小說佮小泉八雲的怪談文學。譯作有《羅生門：芥川龍之介短篇小說選Ｉ》（木馬文化）、臺灣前輩作家楊逵先生日文版作品〈鵝姊仔出嫁〉、〈水牛〉等（收錄佇前衛出版的《楊逵經典台文有聲讀本：春光閘袂離》）。 台文散文創作發表佇《自由副刊》、《臺江臺語文學》、《台文戰線》、《海翁台語文學》等。獲二〇二五年「雲林縣文學獎」散文類優選。 ● 【台文校對＝董育儒Táng Io̍k-jû】 一九六四年生，嘉義縣中埔鄉人，輔仁大學語言學研究所碩士。一九八四年開始台語研究，參加幾若擺的國際性閩南語研討會並有論文發表，有十外篇台語文捌發表佇數種台語文雜誌頂面；一九九九年榮獲臺灣省八八年鄉土語文競賽閩南語教師組音字項第一名；二〇〇〇年曾擔任全省性閩南語競賽的評判佮各地母語教師研習營講師。

【人間失格】 踏話頭 第一手記 第二手記 第三手記 後記 【附錄】 外語人名按怎翻khah好勢？Uì《人間失格》講起 翻譯借詞真利便，m̄-koh啥mi̍h ē-tàng借、啥mi̍h bē-tàng？ 台語欠詞按怎補？

彼个查埔人的相片，我看過三張。 一張應當是伊細漢時，可能十歲左右，邊仔全查某（可能是親姊妹仔，無就是親堂）。伊徛佇庭園水池邊，穿粗條紋hâ-khá-mà裙褲，頷頸仔倒歪欲三十度，笑甲誠歹看。歹看？毋過，若是較鈍的（就是無咧看媠䆀的人），會無表無情講一聲： 「囡仔古錐呢。」 雖罔聽就知影是客氣話，這囡仔笑起來嘛毋是完全無一絲仔天真可愛，毋過若見過世面知影媠䆀，無定影著就會講： 「哎唷，這囡仔哪生做按呢！」 講煞緊共相片掰予掉，袂輸咧掰蟲仔。 講實在，毋知為啥這囡仔笑起來予人愈看無法度定著。彼毋是咧笑。這囡仔根本都無咧笑。你看伊兩个拳頭拇攏捏咧就知。哪有人那捏拳頭拇那笑的。是猴。伊是像猴山仔咧笑，只是面皺襞襞，歹看甲。別人看著無定會講「這囡仔哪皺面皺甲」。而且，囡仔這號表情實在奇妙，毋知為怎樣感覺腌里腌臢，予人看著想欲吐。囡仔人表情遮爾不可思議，我是從來毋捌看過。 第二張的面看起來完全無仝，予人驚一趒。看起來是學生仔。可能是高等學校，抑是大學的相片，雖然毋知啥物時陣，毋過就是一个生甲足媠的讀書囡仔。只是講無知為啥，無一點活人的氣。伊穿制服，胸坎的橐袋仔有囥展予人看的白手巾仔，坐籐椅，腰靠咧，雙跤交叉，嘛是咧笑。這遍伊毋是皺面的猴仔笑，是節甲拄拄仔好的微微仔笑，毋過嘛講袂出為啥物就是佮人的笑無仝。無定會使講，伊無一點血的重量抑是性命的深度，無一絲仔實在的感覺；就是因為按呢，伊無像鳥仔，是輕如鳥仔毛，一張白紙，而且閣佇遐咧笑。會使講，自頭到尾攏是演出來的。講「假仙」，也不只。講「輕薄」，嘛毋但。講「妖嬌」，嘛毋是按呢爾爾。講「媠」，當然嘛無法度完全來形容。而且，若是斟酌看，會發現這个緣投的學生仔予人想著鬼仔古彼類的。生做按呢媠甲袂對同的少年家，我是從來毋捌看過。 閣一張，是上奇怪的。年歲完全看袂出來。頭毛已經有一寡發白。翕相的所在是一个垃圾甲驚人的房間（壁有三跡落落來，佇遐現現），相片中的人雙手夯佇烘爐頂懸，這遍無咧笑矣。伊一屑仔表情都無。袂輸人𫞼咧、手囥烘爐頂就按呢自然死去，實在是一張予人袂爽快，感覺不祥、歹吉兆的相片。毋過，奇怪的所在毋但按呢。這張相片，面翕了足大，逐跡攏看現現，毋過伊的頭額生甲誠普通，頭額的皺痕普通，目眉、目睭嘛普通仔普通，鼻、喙、下頦嘛是，哎，這个面是一點表情就無，予人無印無象。就算我看過這張相片才共目睭瞌起來，嘛會隨袂記這面生做按怎。房間的壁抑是彼隻小隻烘爐遮的猶原想會起來，毋過房間主人的面煞袂輸雺霧散去，毋管按怎就是想袂起來。伊彼款面，無法度做畫。嘛無法度做尪仔圖。目睭展予開閣看一遍，嘛無「著著著，就是這个面」彼種想起來的歡喜。講較歹聽咧，就算目睭展予開閣看相片，嘛想袂起來。而且，會予人感覺刺疫兼齷齪，袂癮閣看。 就算是「死人面」，嘛比這个面有表情、有印象，人身敆馬頭無定就是這種感覺，橫直別人看著攏會驚、攏會無爽快。這个查埔人的面遮爾仔奇怪，我是真正從來毋捌看過。

作者：太宰治(だざいおさむ Dazai Osamu) 譯者：吳孟儒 出版社：木馬文化 書系：做伙來讀 出版日期：2026-03-04 ISBN：9786263149076 城邦書號：A0500969 規格：平裝 / 單色 / 208頁 / 14.8cm×21cm